| |
LANDSSKIPULAG
Hugtakið landsskipulag er almennt notað um samræmda skipulagsstefnu ríkisins, en slík stefna er sett fram af stjórnvöldum á landsvísu í flestum nágrannalöndum okkar. Hér á landi hefur ekki myndast hefð fyrir slíkri skipulagsstefnu og í skipulags- og byggingarlögum er ekki mælt beint fyrir um gerð landsskipulags.
Hlutverk Skipulagsstofnunar varðandi landsskipulag
Samkvæmt 11. gr. skipulags- og byggingarlaga ber Skipulagsstofnun að afla gagna, hafa aðgang að og varðveita áætlanir opinberra aðila um landnotkun sem varða landið allt, svo sem um samgöngur, fjarskipti, orkumannvirki og náttúruvernd. Samkvæmt 4. gr. sömu laga ber Skipulagsstofnun að sjá um að upplýsingar um áætlanir um landnotkun á landsvísu séu fyrir hendi og stuðla að innbyrðis samræmi þeirra. Ennfremur getur umhverfisráðherra skv. 11. gr. skipulags- og byggingarlaga, að höfðu samráði við forsætisráðherra og Samband íslenskra sveitarfélaga, skipað nefnd til að gera tillögur um samræmingu áætlana á landsvísu, ef í ljós hefur komið að ósamræmi eða hagsmunaárekstrar um landnotkun eru á milli áætlana.
Ákvæði 11. gr. skipulags- og byggingarlaga hafa í raun ekki komið til framkvæmda. Ræður þar m.a. að ekki hefur legið fyrir nægilega ljóst hvert svigrúm og hlutverk ríkisins/umhverfisráðuneytis er skv. greininni til að vinna að greiningum og tillögugerð á landsskipulagsstigi. Af þeim sökum taldi Skipulagsstofnun þörf á að fara út í rannsóknar- og þróunarverkefni um landsskipulagsgerð, þar sem jafnframt væri skoðað hvernig umhverfismat skv. tilskipun Evrópusambandsins félli best að áætlanagerð um landnotkun á landsvísu. Tvær fyrstu skýrslur þeirrar vinnu eru nú komnar út og fjalla um landsskipulag á Norðurlöndum og forsendur innleiðingar tilskipunar um umhverfismat áætlana hér á landi.
Áætlanir um landnotkun á landsvísu
Dæmi um áætlanir sem unnar eru af stjórnvöldum á landsvísu og varða landnotkun og byggðaþróun með einum eða öðrum hætti eru t.d. byggðaáætlun, landgræðsluáætlun, náttúruverndaráætlun og samgönguáætlun (til fjögurra ára og til tólf ára). Einnig má nefna áætlanir um landshlutabundin skógræktarverkefni, s.s. Norðurlandsskóga og Vesturlandsskóga, en þær eru unnar af sérstökum stjórnum hvers landshlutaverkefnis á grundvelli laga um landshlutabundin skógræktarverkefni.
Flestar áætlanir stjórnvalda um landnotkun á landsvísu eru háðar ákvæðum tilskipunar Evrópusambandsins um umhverfismat áætlana.
Sérstakt svæðisskipulag
Í 15. gr. skipulags- og byggingarlaga er gert ráð fyrir að tilteknar framkvæmdir og áætlanir geti fengið svokallaða sérstaka svæðisskipulagsmeðferð. meira ...
Leiðbeiningar og fræðsluefni um landsskipulag
Nýkomin er út skýrsla hjá Skipulagsstofnun þar sem fjallað er um stjórnkerfi og framkvæmd landsskipulagsgerðar á Norðurlöndunum: Skipulagsgerð á landsvísu á Norðurlöndum.
|
|